Stats NZ has a new website.

For new releases go to

www.stats.govt.nz

As we transition to our new site, you'll still find some Stats NZ information here on this archive site.

  • Share this page to Facebook
  • Share this page to Twitter
  • Share this page to Google+
Te Kupenga 2013 (te reo Māori) – i whakatikangia
Embargoed until 10:45am  –  06 May 2014
He kupu kōrero

View this page in English

Mō Te Kupenga

Me he kupenga hao ika, koinei te kupenga hao tangata.

Ko Te Kupenga te rangahau tuatahi a Tatauranga Aotearoa mō te oranga o te Māori. Ko tā te rangahau he whakaatu i te tirohanga whānui o te oranga pāpori, ahurea me te ōhanga o te Māori i Aotearoa. Kei roto ko ngā tātai oranga pāpori me te ōhanga, engari he whakauru anō i ngā tātai hou e ai ki te tirohanga a te Māori mō te oranga.

Ina tātaihia te oranga ahurea Māori, ka tīmata a Te Kupenga mai i te mātāpono matua o te tūhonohono. Ko te uara o te ahurea ka ahu mai i te hiranga o ngā mōhiotanga ahurea, uara, whanonga hoki e āhei ai ngā tāngata ki te tūhonohono ki a rātau anō me tō rātau taiao, ā, e mōhio ai rātau ko wai rātau, nō hea rātau. E tīmata ana i tēnei mātāpono, ka aro a Te Kupenga ki ngā taha e whā o te oranga ahurea:

  • wairuatanga
  • tikanga
  • te reo Māori
  • whanaungatanga.

Mā ēnei taha e whā e taea e te tangata te tūhono atu ki te ao Māori.

Ko ngā mahi e pā ana ki te tikanga, pēnei i te haere ki te marae, me ngā āhuatanga onāianei pēnei i te kapa haka, te waka ama rānei, ngā tikanga e tūhono ā-ahurea ai ngā tāngata ki a rātau anō. Mā te reo Māori e taea e ngā tāngata te tūhono mā te reo. Ko te whanaungatanga me te wairua he tūhono ki te ao ora me te ao popohe, me te āhua me te kaha o aua whanaungatanga. 

Ka titiro a Te Kupenga ki ngā whanonga, mōhiotanga, me ngā whakaaro o te Māori ki ēnei wāhanga e whā. Nā te whakawhitiwhitinga kōrero whānui ki ngā tāngata whai pānga Māori i puta ai ngā kaupapa o Te Kupenga.

Koinei te putanga tuatahi o ngā kōrero mai i Te Kupenga, ā, kei roto nei he tirohanga tatauranga mō ngā wāhanga whānui e whā o te oranga ahurea Māori. Ka whakaputaina e mātau ētahi atu raraunga mai i Te Kupenga i roto i te tau e heke nei, tae atu ki tētahi pūrongo hōhonu mō te reo Māori hei te marama o Hōngongoi 2014. Ko ngā wāhanga mō te āheinga me te whakamahi i te reo Māori kei te āhua o te taupori o Aotearoa i kī rātau he mātāwaka Māori rātau, ā, 15 tau, neke atu rānei te pakeke. I pēnei ai kia noho taurite tonu ki te Tirohanga o te tau 2001 ki te Oranga o te Reo Māori. Ko ētahi atu o ngā wāhanga katoa kei te āhua o te taupori o Aotearoa e kī ana rātau he mātāwaka Māori rātau, he uri Māori rānei ō rātau, ā, he 15 tau, neke atu rānei te pakeke.

Ki te nuinga o ngā Māori he mea nui te ahurea Māori

To ngākau ki ngā taonga a ō tūpuna, hei tikitiki mō tō māhuna.

I te tau 2013, e 373,000 (70 ōrau) ngā Māori he 15 neke atu ngā tau i kī he mea nui (he mea tino nui, he mea āhua nui, he mea nui rānei) kia whai wāhi atu ki tō rātau ao Māori. He 20 ōrau anō i kī he paku nei ōna pānga. He 10 ōrau anake i kī kāore ōna pānga.

Kāore he tino rerekētanga o ngā rōpū ā-tau i kī he mea nui kia whai wāhi ki te ao Māori. Engari, ko te nuingā o ngā Māori 55+ tau te pakeke (29 ōrau) i kī he mea tino nui te ao Māori tēnā i ngā Māori rangatahi ake.

Kauwhata, Te hiranga o te whai wāhi ki te ao Māori, Mā te rōpū ā-tau, Pipiri–Hereturikōkā 2013.

Ko te nuinga o ngā pakeke Māori i Te Taitokerau (82 ōrau) i kī he mea nui ki a rātau kia whai wāhi rātau ki tō rātau ao Māori tēnā i ētahi atu Māori o rohe kē. He iti ake te kī pēnei a ngā Māori i Waitaha (59 ōrau) me te nuinga atu o Te Waipounamu (61 ōrau).

E whakaatu ana ngā wāhanga e whai ake i ngā āhuatanga rerekē e tūhono ai te Māori ki tō rātau ao Māori.

E rua hautoru i kī he mea nui te taha wairua

Tō wairua ki te Atua nāna nei ngā mea katoa.

Mai rā anō te Māori i whakapono ai ki te taha wairua hei oranga mōna. E whakaaturia ana te tuakiritanga Māori i roto i te taha wairua, he here whanaungatanga, he whakaū i te tauritetanga me te tūhonotanga i waenga i te ao wairua me te ao Māori. I te mea he tino uaua te tātai i te taha wairua, i aro a Te Kupenga ki ngā tātaitanga o te hiranga o te taha wairua.

I te tau 2013, e 345,500 (66 ōrau) ngā pakeke Māori i kī he mea nui (he mea tino nui, he mea āhua nui, he mea nui rānei) te taha wairua ki tō rātau ao. Ka whakataurite atu ki te 18 ōrau anake o rātau i kī kāore ōna pānga.

He nui ake te whakapono o ngā wāhine Māori (74 ōrau) ki te hiranga o te taha wairua tēnā i ngā tāne Māori (57 ōrau).

Kauwhata, Te hiranga o te taha wairua, Mā te ira tangata, Pipiri–Hereturikōkā 2013.  

He iti ake i te haurua i kī he mea nui te whakapono

Whā tekau mā rima ōrau o ngā pakeke Māori i kī he mea nui te whakapono (he mea tino nui, he mea āhua nui, he mea nui rānei). Ka whakatauritea tēnei ki te 21 ōrau o te hunga i kī he paku nei ōna pānga, me te 34 ōrau i kī kāore ōna pānga.

He rerekē te whakatinana a te Māori i ngā tikanga

Tangata akona ki ngā tikanga, tū ana ki te marae, tau ana.

He rerekē te tūhono me te whakauru a ngā pakeke Māori ki tō rātau ao Māori, he rerekē hoki ō rātau māramatanga, ka mutu mō ngā take rerekē anō. Ko te tikanga mai rā anō o te tūhono atu ki tō ao Māori ko tō mōhio ki tō iwi, hapū me tō marae ka mutu me haere anō ki tō marae me ētahi atu wāhi tuku iho. Kei reira anō ētahi atu āhuatanga o nā noa nei o te tūhonotanga; hei tauira, ko te haere ki te akoranga reo Māori, te uru ki ngā mahi kapa haka, te mātakitaki rānei i te pouaka whakaata Māori.

Ko te nuinga o ngā Māori he mōhio ki tō rātau iwi

I te tau 2013 he 89 ōrau o ngā pakeke Māori i kī he mōhio rātau ki tō rātau iwi – ko te āhuatanga tēnei i tino mōhiotia o tō rātau tuakiritanga Māori, pepeha rānei. Hei tāpiri:

  • E 71 ōrau (371,000) i te mōhio ki tō rātau marae tipuna
  • E 58 ōrau i te mōhio ki tō rātau maunga
  • E 56 ōrau i te mōhio ki tō rātau awa, moana, roto
  • E 55 ōrau i te mōhio ki tō rātau hapū
  • E 55 percent ōrau i te mōhio ki tō rātau tipuna
  • E 52 ōrau i te mōhio ki tō rātau waka.

Neke atu i te hautoru (39 ōrau) o ngā pakeke Māori he mōhio ki ēnei āhuatanga katoa o tā rātau pepeha. He 9 ōrau o ngā pakeke Māori kāore i paku mōhio ki ēnei mea katoa.

Ko te nuinga o ngā Māori pakeke ake (55+) he mōhio ake ki tā rātau pepeha tēnā i ngā Māori rangatahi ake. E 49 ōrau o ngā Māori 55+ ngā tau i te mōhio ki te katoa, ā, ka whakataurite atu ki te 28 ōrau mō te hunga 15–24 ngā tau, ā, 39 ōrau mō te hunga 25–34 ngā tau. 

He kaha te tūhonotanga o ngā Māori ki tō rātau tūrangawaewae

O ngā pakeke Māori e 371,000 i te mōhio ki tō rātau marae tipuna, ā, e 77 ōrau i kī koinā tō rātau tūrangawaewae. Neke atu tēnei i te haurua (54 ōrau) o ngā pakeke Māori katoa.

Toru tekau mā ono ngā pakeke Māori i kī he kaha, tino kaha rānei tō rātau hono ki tō rātau tūrangawaewae, ā, 12 ōrau i kī he āhua tūhono atu. O te hunga i kī ko tō rātau marae tō rātau tūrangawaewae, he rua hautoru i kī he kaha, he tino kaha rānei tēnei hono. 

Kauwhata, Hono ki tō rātou tūrangawaewae, Pipiri–Hereturikōkā 2013.

He kaha ake te kī a ngā Māori pakeke ake (55+) tēnā i ngā Māori rangatahi ake ko tō rātau marae tipuna tō rātau tūrangawaewae. Ko te tikanga he kaha ake, tino kaha ake rānei tō rātau tūhonotanga i ngā Māori rangatahi ake. I raro tonu i te haurua (49 ōrau) o ngā Māori 55+ ngā tau he kaha, tino kaha rānei te tūhonotanga, ka whakataurite atu ki te 25 ōrau o te hunga 15–24 ngā tau, ā, he 31 ōrau o te hunga 25–34 ngā tau. 

Ko te nuinga o rātau ka tae atu ki tō rātau marae

O ngā pakeke Māori e 371,000 i kī he mōhio rātau ki tō rātau marae tipuna, he 89 ōrau kua tae ki reira i tētahi wā. Arā, e 48 ōrau i kī i tae i roto i te 12 marama kua taha ake. O ngā pakeke Māori katoa (te hunga i te mōhio ki tō rātau marae tipuna me te hunga kāore i te mōhio), e 62 ōrau i tae ki tō rātau marae tipuna, tae atu ki te 34 ōrau i tae i roto i ngā marama 12 kua pahure.

O ngā pakeke Māori i te mōhio ki tō rātau marae tipuna, e 59 ōrau i kī kei te hiahia rātau ki te haere ki tēnei marae, kia nui ake rānei te haere atu.

Ko te utu te aukatinga matua o te kore tae ki te marae tipuna. He toru hauwhā o ngā pakeke Māori kei te hiahia haere atu, kia nui ake rānei te haere atu, i kī kāore i tino whai moni ki te haere. Ko ētahi atu o ngā aukatinga ko te kore whai wā (55 ōrau), he kore i pōhiritia, kore kaupapa rānei ki te haere (39 ōrau).

Tata ki te katoa o ngā pakeke Māori (96 ōrau) kua tae ki tētahi marae, ā, e 56 ōrau i tae atu i roto i ngā marama 12 kua pahure. 

Kei roto ngā Māori i ngā mahinga ahurea o ēnei rā

Ko te mahinga onāianei i tino pūrongohia e ngā pakeke Māori ko te mātakitaki i tētahi whakaaturanga pouaka whakaata Māori. I te tau 2013, e 396,500 (75 ōrau) i kī i tae i roto i te 12 marama kua taha ake. Ko tētahi atu o ngā tikanga a ngā pakeke Māori i whakaatu i tō rātau tuakiritanga ko te kōrerorero, te rangahau rānei i tō rātau whakapapa (60 ōrau), me te waiata i tētahi waiata Māori, te haka, te tuku i tētahi mihi, whaikōrero rānei, te whakauru rānei ki ngā mahi whakaari, mahi toi rānei (56 ōrau).

Ko ētahi atu o ngā whakaaturanga ahurea: 

  • te mau whakakai Māori, pēnei i te pounamu, tiki rānei (49 ōrau)
  • te ako, te mahi i ngā mahi a te Māori me ētahi atu (46 ōrau)
  • te whakapā atu ki ētahi atu Māori mā tētahi paetukutuku kōtuitui tāngata, pēnei i a Facebook, Twitter rānei (44 ōrau)
  • te haere ki tētahi hui (39 ōrau)
  • te haere ki tētahi taiopenga Māori, huihuinga rānei pēnei i ngā whakataetae Pā, Matariki, ngā whakanuitanga o Te Rā o Waitangi (37 ōrau)
  • te mau kākahu tohu Māori, pēnei i tētahi tī-hāte nō te iwi (35 ōrau)
  • te whakarongo ki tētahi teihana reo irirangi Māori (34 ōrau)
  • te ako i te ao Māori i tētahi whare pukapuka, whare taonga, Ipurangi Māori rānei (27 ōrau)
  • te pānui i tētahi maheni Māori, pēnei i a Mana, Tū Mai rānei (25 ōrau)
  • te mahi i tētahi atu mahi ako reo Māori, ahurea Māori rānei (25 ōrau)
  • te whai wāhi ki ngā mahi rongoā Māori, mirimiri rānei (11 ōrau).

Ko te tikanga he kaha te whai wāhi o ngā wāhine Māori ki ngā mahinga ahurea Māori o ēnei rā tēnā i ngā tāne Māori. Ko te rerekētanga nui ā-tangatatanga ko te mau whakakai Māori (57 ōrau ngā wāhine, 40 ōrau ngā tāne), me te whakapā atu ki ētahi atu Māori mā ngā paetukutuku kōtuitui tāngata (48 ōrau ngā wāhine, 39 ngā tāne).

Ko ngā mahi a ngā Māori rangatahi ake (15-24) he nui ake i ngā Māori pakeke ake (55+) te whakapā atu ki ētahi atu Māori mā ngā paetukutuku kōtuitui tāngata (54 ōrau ngā Māori rangatahi ake, 22 ōrau ngā Māori pakeke ake), me te waiata i tētahi waiata Māori, te haka, te tuku i tētahi mihi, whaikōrero rānei, te whakauru rānei ki ngā mahi whakaari, mahi toi rānei (60 ōrau ngā Māori rangatahi ake, 49 ōrau ngā Māori pakeke ake).

Te whakamahi i te reo Māori

Ko te reo te mauri o te mana Māori.

Ko te kōrero reo Māori tētahi huarahi e tūhono ai ki te ao Māori me te reo. Neke atu i te 20 tau, ko te taunaki i te whakamahitanga o te reo Māori te aronga o ngā kaupapa maha a te kāwanatanga me ngā hapori.

I whakamahia e Te Kupenga ētahi pātai o te Tirohanga ki te Oranga o te Reo Māori a Te Puni Kōkiri i te tau 2001 i muri i te Tatauranga Whānui, ki te whakanui ake i te whakatauritetanga i waenga i ngā wā rangahau e rua. Ahakoa he ōrite ngā tikanga whakahaere o ēnei rangahau e rua, nā ētahi atu whakahaerenga rerekē i waenga i ngā puna raraunga e rua i whakaawe pea i ngā hua i puta i aua wā. Nā tēnei, me āta tūpato ina whakataurite ana koe i ngā raraunga i waenga i Te Kupenga me te Tirohanga ki te Oranga o te Reo Māori o mua atu.

Tirohia te kounga raraunga mō ētahi atu mōhiohio e pā ana ki te whakataurite huinga raraunga.

Neke atu i te haurua o ngā Māori e āhua mōhio ana ki te kōrero i te reo Māori

I te tau 2013, tata ki te 257,500 (55 ōrau) ngā Māori 15 neke atu ngā tau i kī he āhua mōhio ki te kōrero i te reo Māori; arā, ka taea e rātau te kōrero i tua atu i ētahi kupu noa iho, ētahi kīanga rānei i te reo. Otirā, e 50,000 (11 ōrau) he 'pai rawa atu', 'pai' rānei te mōhio ki te kōrero i te reo Māori, ā, 44 ōrau he 'āhua pai', 'kāore i te tino pai' rānei. I kī te toenga 45 ōrau ko te kaha o tō rātau mōhio 'kāore i tua atu i ētahi kupu noa iho, i ētahi kīanga rānei'.

Heoi, i kitea e te Tirohanga ki te Oranga o te Reo Māori o te tau 2001 he 153,000 (42 ōrau) ngā pakeke Māori i kī he pūkenga ō rātau ki te kōrero i te reo Māori. I waenga i te tau 2001 me te 2013 ko te nuinga o te pikinga o te hunga i kī he kōrero Māori rātau mō te hunga i kī kāore i tino pai tō rātau reo. Ko ngā tatau o te hunga i kī he pai rawa atu, he pai, he āhua pai rānei te kōrero i te reo kāore i tino rerekē.

Kauwhata, Te kaha o te kōrero i te reo Māori, Mā te taumata o te kaha, 2001, 2013.

Ka kohi anō te tatauranga whānui i ngā kōrero mō te hunga e mōhio ana ki te kōrero i te reo Māori. I kitea e te tatauranga whānui i waenga i ngā tau 2001 me te 2013 ko te ōwehenga o ngā pakeke Māori i kī ka taea e rātau te kōrerorero i ia rā i te reo i heke mai i te 28 ōrau ki te 24 ōrau.

He uaua te whakataurite hāngai nā ngā rerekētanga o te rangahau (tirohia te kounga raraunga). Engari, ko te āhua nei i whakatau tatahia e tēnei tatauranga whānui te hunga i roto i Te Kupenga i kī he mōhio ki te kōrero i te reo Māori ki te taumata pai rawa atu, pai, āhua pai rānei – i piki mai i te 20 ōrau ki te 23 ōrau i te tau 2013. 

He pikinga o ngā Māori rangatahi ake e āhua mōhio ana ki te kōrero Māori 

Mai rā anō, he nui ake ngā Māori pakeke ake he whai mōhio ki te reo Māori i ngā mea rangatahi ake. Nā tēnei, i roto i ngā tau 20 neke atu he maha ngā kaupapa i aro ki ngā Māori tamariki ake (hei tauira, Te Kōhanga Reo me Te Kura Kaupapa).

I waenga i te tau 2001 me te 2013 he tino nui te piki o te ōwehenga o ngā rangatahi Māori (15–24) i kī rātau he mōhio ki te kōrero Māori. Ā, kāore he rerekētanga mō te ōwehenga o ngā Māori 55+ ngā tau.

Nā te pikinga, i kitea i roto i Te Kupenga i te tau 2013 he ōrite ngā ōwehenga o ngā Māori i kī he mōhio ki te kōrero i te reo Māori i roto i ngā rōpū ā-tau katoa. 

Kauwhata, E āhua mōhio ana ki te kōrero i te reo Māori, Mā te rōpu ā-tāu, 2001, 2013.

Ngā Māori pakeke ake he pai, pai rawa atu rānei i ngā Māori rangatahi ake ki te kōrero i te reo

I te tau 2013, 17 ōrau o ngā Māori 55+ i kī he pai, he pai rawa atu rānei te mōhio ki te kōrero i te reo Māori. I heke tēnei mai i te 29 ōrau i te tau 2001.

Mō ngā rōpū rangatahi ake he 8 ki te 11 te ōwehenga, kāore he rerekētanga mai i te tau 2001.

He maha ake hoki te nuinga o ngā Māori pakeke ake i kī pea i ako rātau i te reo Māori hei reo tuatahi, arā, koinei tō rātau reo tipu i a rātau e tamariki ana ka mutu kei te mārama tonu rātau. Tekau mā rima ōrau o ngā Māori he 55+ ngā tau i ako i te reo Māori hei reo tuatahi, ā, ko ngā Māori 15–34 ngā tau he 8 ōrau.

He 4 ōrau anake ngā Māori 35–44 ngā tau me te 6 ōrau o te hunga 45–54 ngā tau i kī ko te reo Māori tō rātau reo tuatahi.

Te maha o ngā pakeke Māori e kōrero ana i te reo Māori
Mā te rōpū ā-tau me te matatau ki te reo
2001 me 2013
 
Rōpū ā-tau (ngā tau)
Te matatau
Pai rawa atu / pai āhua pai kāore i te tino pai kāore i tua atu i ētahi kupu noa iho, kīanga rānei
  2001
15–24 6,000 13,000 24,500 58,500
25–34 3,000 8,500 22,500 54,000
35–44 4,000 7,000 17,000 49,500
45–54 6,000 5,500 10,500 27,500
55+ 14,000 5,000 7,000 21,000
Total 33,000 39,000 81,500 210,500
 

2013

15–24 11,000 17,000 43,000 60,500
25–34 9,000 12,500 28,500 35,500
35–44 9,000 10,000 29,500 39,000
45–54 6,500 8,500 25,000 39,000
55+ 14,500 8,500 25,000 38,500
Total 50,000 56,500 151,000 213,000

 

Ko ngā wāhine Māori ngā mea e kaha ana ki te kōrero i te reo Māori

Tata ki te 3 ngā wāhine Māori i roto i te 5 (58 ōrau) he mōhio ki te kōrero i te reo Māori. I roto i tēnei 12 ōrau he pai rawa atu, he pai rānei te mōhio ki te kōrero i te reo Māori, me te 46 ōrau o rātau he āhua pai, kāore i te tino pai rānei te mōhio. Mō ngā tāne Māori he 9.1 he pai rawa atu, he pai rānei ki te kōrero i te reo Māori, me te 42 ōrau o rātau he āhua pai, kāore i te tino pai rānei te mōhio.

Ko te ōwehenga rerekē i waenga i ngā tāne me te wahine i pai, i pai rawa atu rānei te mōhio ki te kōrero Māori he tino nui ake i ngā rōpū tamariki ake. I ngā tau 15–24 me te 25–34 he kaha ake ngā wāhine i ngā tāne he pai, he pai rawa atu rānei te mōhio ki te kōrero i te reo Māori. Mō ngā Māori 55+ ngā tau, he nui ake ngā tāne i ngā wāhine he pai, he pai rawa atu rānei te mōhio ki te kōrero i te reo Māori (18 ōrau ngā tāne ki ngā wāhine he 16 ōrau).

Kauwhata, E pai, pai rawa atu ana rānei ki te kōrero i te reo Māori, Mā te rōpū ā-tau me te ira tangata, Pipiri–Hereturikōkā 2013.  

Te whakamahi i te reo Māori i ngā āhuatanga rerekē

Ko tētahi aronga nui o ngā kaupapa whakakaha i te ora o te reo Māori ko te whakamahitanga i roto ngā kāinga me ngā hapori Māori.

I te tau 2013, he 164,500 (35 ōrau) ngā pakeke Māori i kī he kōrero Māori i roto i te kāinga. He ōrite tēnei ki te 64 ōrau o ngā pakeke Māori i kī he mōhio rātau i tua atu i ētahi kupu noa iho, i ētahi kīanga rānei. E 36,000 (8 ōrau) o ngā pakeke Māori i kī he ōrite tō rātau kōrero Māori ki te kōrero Ingarihi ki tētahi atu i roto i tō rātau kāinga.

E kōrero tonuhia ana te reo Māori ki ngā tamariki i roto i te kāinga

Ko ngā pakeke Māori he mōhio i tua atu i ētahi kupu noa iho, i ētahi kīanga rānei ko te tikanga ka kōrero ki ā rātau tamariki i te kāinga, otirā ngā kōhungahunga, tamariki kura tuatahi hoki.

Neke atu i te 80 ōrau o ngā pakeke Māori e noho ana me ngā tamariki kōhungahunga i kōrero i ētahi kōrero Māori ki a rātau, tae atu ki te 18 ōrau o rātau he haurua, neke atu rānei te wā e kōrero ana Māori ki a rātau.

Ko te nui o te reo Maori e kōrerohia ana i ngā kāinga he ōrite ki ngā hua o te tau 2001.

Te nui o te reo e kōrerohia ana i te kāinga
Mā te tangata kōrero
Pipiri–Hereturikōkā 2013

Te tangata kōrero  Te nui o te reo
Te reo Māori te katoa/ te nuinga rānei   Rite tonu te nui o ngā reo e rua Ētahi reo Māori    Kāore he reo Māori
Ōrau 
Mātua  1.6 10.5   40.8  47.1
Hoa rangatira  2.4  7.6  46.0  44.0
Tamariki kōhungahunga  7.2  11.1  63.4  18.3
Tamariki kura tuatahi  5.5  11.7  62.0  20.9
Tamariki kura tuarua  4.7  9.5  58.4  27.4

 

Kua iti haere ake te kōrerohia o te reo Māori i waho o te kāinga

Mai i te tau 2001 ki te 2013 ko te ōwehenga o ngā Māori e kōrero ana i te reo Māori i te katoa, te nuinga rānei o te wā i heke i roto i ngā mahi katoa i waho o te kāinga.

I roto i ngā hui, ko te ōwehenga o ngā Māori i kōrero i te reo Māori i te katoa, i te nuinga rānei o te wā i heke mai i te 22 ōrau i te tau 2001 ki te 11 ōrau i te tau 2013; mō te āwhina i te kura i heke mai i te 19 ōrau ki te 12 ōrau.

Ko te kōrero i te reo Māori i waho i te kāinga i tino mahia i te wā ka haere ki tētahi karapu, rōpū rānei (pēnei i te kapahaka), te āwhina i te kura, me te haere ki ngā hui.

Te nui o te reo e kōrerohia  ana i waho o te kāinga
Mā te mahinga
Pipiri–Hereturikōkā 2013

Te mahinga Te nui o te reo
Te reo Māori te katoa/ te nuinga rānei   Rite tonu te nui o ngā reo e rua  Ētahi reo Māori      Kāore he reo Māori
 Ōrau
E toro ana i ngā whanaunga/hoa 2.4   8.2  42.5  46.8
E mahi ana   4.0  6.4  31.3  58.2
Hākinakina  1.5  5.8  22.5  70.2
E āwhina ana i te kura  12.5  12.1  42.3  33.2
Mahi whakapono  13.5  10.5  36.7  39.4
Mahi kaupapa ā-rōpū  14.1  13.6  37.2  35.1
Hui  10.6  14.0  49.3  26.1

 

Ki te nuinga kei te pai haere tō rātau whānau

E tipu e rea mō ngā rā o tō ao.

Ko te whānau te tūāpapa o te ao Māori ka mutu koinei te kaupapa matua o te oranga me te tūhonotanga o te Māori. I te mea he maha ngā hono o te whānau i waho o te kāinga, ko ngā kōrero mō te whānau he huarahi atu anō i tua atu i ngā tātai ā-whare anake o mua. Engari, ko tā mātau e tūmanako ana ko aua tātai oranga whānau hou ka tautoko i ngā tātai onāianei me te whakahōhonu i te tirohanga o te oranga whānau. 

I te tau 2013, ko te nuinga (83 ōrau) o ngā pakeke Māori i kī kei te pai tō rātau whānau, kei te tino pai rawa atu rānei. He tika tēnei mō ngā rōpū ā-tau katoa. He 7 ōrau anake ngā pakeke Māori i kī he āhua pai, kāore i te tino pai rānei tō rātau whānau.

Ko ngā Māori he 55+ ngā tau (17 ōrau) ko rātau ngā mea e kaha ana te kī kei te tino pai rawa atu tō rātau whānau. Ka whakataurite atu tēnei ki te 13 ōrau o ngā Māori 15–24 tau, 11 ōrau mō te hunga 45–54 ōrau, 8 ōrau mō te hunga 35–44 ngā tau me te 7 ōrau mō te hunga 25–34 ōrau.

Kauwhata, Te oranga o te whānau, Mā te rōpū ā-tau, Pipiri–Hereturikōkā 2013.  

Ko te nuinga o ngā whānau he pai ō rātau whanaungatanga me rātau anō

I te tau 2013, e 84 ōrau o ngā pakeke Māori i kī kei te tino pai tō rātau whānau ki a rātau anō, kei te tino pai rawa atu rānei. He 3 ōrau noa iho o ngā pakeke Māori i kī āhua pai i tō rātau whānau ki a rātau anō, tino kino rānei.

He kaha te hono o te Māori ki te whānau

I te tau 2013, e 435,000 (84 ōrau) ngā pakeke Māori i kite ā-kanohi i ō rātau whānau kāore i noho tahi me rātau kotahi te wā neke atu rānei i ngā wiki e whā kua pahure. Ahakoa he rerekē te kitekite i a rātau, engari he 55 ōrau i kī i kite rātau i tō rātau whānau kotahi te wā i te wiki i te itinga rawa. 

He nui ake te whakapā mā te kore kanohi ki te kanohi. He 489,000 (94 ōrau) ngā Māori i whakapā pēnei, kāore i noho tahi me tō rātau whānau, kotahi te wā neke atu rānei i ngā wiki e whā kua pahure. I roto i tēnei ko te 72 ōrau i whakapā ehara i te kanohi ki te kanohi kotahi te wā i te wiki i te itinga rawa.

He kaha ake te whai pānga atu o ngā wāhine Māori i ngā tāne Māori ki tō rātau whānau tē noho me rātau anō. Ko te ōwehenga o ngā wāhine Māori i kite ā-kanohi i ō rātau whānau i roto i ngā wiki e whā kua hipa he 86 ōrau, he 82 ōrau ki ngā tāne Māori. 

Ko te hiahia o te hautoru o ngā pakeke Māori kia nui ake te whai wāhi ki te whānau

E 6 ngā Māori i roto i te 10 (63 ōrau) i kī he pai te nui te wā e whai pānga ai rātau ki ō rātau whānau tē noho me rātau anō; e 34 ōrau i kī kāore e nui rawa te wā i whai pānga ai ki tō rātau whānau, ā, e 2 ōrau i kī he nui rawa. 

Ko te nuinga o ngā pakeke Māori i taea e rātau ngā tautoko ahurea

E rua hautoru (64 ōrau) o ngā pakeke Māori i kī he 'māmā', he 'tino māmā' rānei te kimi i tētahi tangata ki te āwhina i a rātau me ngā tikanga ahurea, pēnei i te haere ki tētahi tangihanga, te whaikōrero i tētahi hui, te karakia rānei i tētahi taonga. He 15 ōrau atu anō i kī he 'uaua', he 'tino uaua' rānei te toro tautoko ahurea me te kī anō a te 4 ōrau kāore rātau i te hiahia āwhina mō ēnei mahi.

Ko ngā Māori 15–24 ngā tau (17 ōrau) he uaua ake, tino uaua rānei te kimi āwhina mō ngā mahi ahurea Māori tēnā i te hunga 55+ ngā tau (12 ōrau). Me te aha, ko ngā Māori pakeke ake he tino iti ake te hiahia āwhina mō ngā mahi ahurea tēnā i ngā Māori rangatahi ake.

O ngā Māori pakeke i kī me whiwhi āwhina rātau mō ngā mahi ahurea Māori, 59 ōrau kāore i tono āwhina i roto i ngā marama 12 kua pahure; 15 ōrau kotahi noa iho te tono āwhina i roto i ngā marama 12 kua pahure; ā, e rua, neke atu rānei ngā tono āwhina a te hunga 26 ōrau.

He whānui te whakamārama a te Māori i tō rātau whānau

He haurua o ngā pakeke Māori i kī he iti ake tō rātau whānau i te 11 ngā tāngata. I kī tētahi ōwehenga Māori iti, he āhua nui tō rātau whānau – he 11 ōrau i kī e 41, neke atu rānei te maha o tō rātau whānau, ā, e 5 ōrau i kī e 61, neke atu rānei te maha o ngā tāngata kei roto i tō rātau whānau.

Kauwhata, Te maha o ngā tāngata i roto o te whānau, Pipiri–Hereturikōkā 2013.  

Ko te nuinga o ngā Māori i kī ko te pūtake o tō rātau whānau he whakapapa. Tata ki te katoa o ngā Māori (95 ōrau) i kī i roto i tō rātau whānau ko ngā mātua, hoa rangatira, tamariki, tuahine, tungāne hoki. He rua haurima o ngā Māori i whakauru mai i ngā whaea me te matua kēkē, ngā tūngane, tuahine hoki, ngā iramutu, me ngā taokete, hungaona, hungarei hoki.

Kotahi i roto i te waru o ngā Māori (12 ōrau) i whakauru i ngā hoa, i ētahi atu rānei ki roto i tō rātau whānau. O tēnei rōpū, iti ake i te 5 ōrau i kī ko te nuinga o tō rātau whānau he hoa kē.

Tata ki te katoa o ngā Māori (98 ōrau) i kī he whānau anō ngā tāngata kāore i te noho me rātau anō.

Ko te nuinga o ngā Māori pakeke ake he nui ake ō rātau whānau. He haurua o ngā Māori 55+ i kī he 15, iti ake rānei i roto i tō rātau whānau, ā, he 8, iti ake rānei mō ngā Māori 15–24 ngā tau. Ko ngā Māori pakeke ake (55+), he iti ake te whakauru i ō rātau mātua, hoa rangatira, tamariki, me ō rātau tungāne, tuahine, engari he nui ake te whakauru i ō rātau hoa me ētahi atu tēnā i ngā Māori rangatahi ake.

Ko ngā Māori e noho ana i ngā rohe he nui ake te ōwehenga taupori Māori – pēnei i Te Taitokerau, Te Waiariki, me Tūranganui-a-Kiwa/Te Matau-a-Māui, he nui ake ō rātau whānau, ā, me te whakauru anō i ō rātau hoa me ētahi atu ki roto i tō rātau whānau tēnā i ngā Māori o ētahi atu rohe.

Mō ētahi atu raraunga āmiki tirohia ngā ripanga Excel i roto i te pouaka 'Downloads'. 

  • Share this page to Facebook
  • Share this page to Twitter
  • Share this page to Google+

Ka tutuki rānei ō wawata i te mōhiohio o tēnei whārangi?


Top
  • Share this page to Facebook
  • Share this page to Twitter
  • Share this page to Google+