Stats NZ has a new website.

For new releases go to

www.stats.govt.nz

As we transition to our new site, you'll still find some Stats NZ information here on this archive site.

  • Share this page to Facebook
  • Share this page to Twitter
  • Share this page to Google+
He whakamāramatanga ki te reo Māori

View this page in English

"He whakaata te reo i te ngākau, te wairua, te tikanga o te iwi…” Tākuta Kathy Dewes (2012)

He tino take tō te reo ki te kaupapa ahurea, ā, he āhuatanga nui ki te tuakiri ahurea. E whakatinana ana te reo i ngā whakapono me ngā mōhiotanga o te ahurea, he whakaata i te tirohanga ahurea, me te aha me te kawe i ngā uara me ngā tikanga mai i tētahi whakatipuranga ki tētahi atu.

Ko te reo Māori te reo taketake o Aotearoa. Koinei te reo tuku iho o ngā tāngata whenua ka mutu he taonga e tiakina ana i raro i Te Tiriti o Waitangi. He tino take nō te ahurea Māori, ā, he mea nui i roto i ngā whakahaere ahurea, tuakiri hoki (Te Manatū Whakahiato Ora, 2010).

Ko te whakarauora i te reo Māori

Mai i te taenga mai o Tauiwi ki Aotearoa, he nui ngā rerekētanga ki te reo Māori. Koinei te reo matua mō te katoa, kātahi ka heke haere tōna whakamahinga me te pōhēhē o te tokomaha ka mate te reo. Nā ngā mānukanukatanga mō te reo ka puta ngā kaupapa maha hei whakarauora i te reo kia pūmau ai, kia ora ai te reo Māori.

Nā te iwi Māori tonu ngā kaupapa whakarauora tuatahi. Kei roto i ēnei kaupapa ko te rā o te reo Māori (ko te wiki o te reo Māori ināianei) i te tau 1975 me ngā kaupapa whakarauora reo Māori i te tīmatanga o ngā tau 1980 pēnei i Te Ataarangi, Te Kōhanga Reo me Te Kura Kaupapa Māori.

I tāpaetia te Kerēme Reo Māori Wai 11 i te tau 1985 ki Te Rōpū Whakamana i te Tiriti o Waitangi me te tono kia tiakina, kia whakamanahia te reo Māori. Ko te whakatau a te taraipiunara he taonga te reo e tiakina ana i raro i te Tiriti o Waitangi, ā, e herea ana te kāwanatanga ki te tiaki me te tautoko i te reo.

Nā te Ture o Te Reo Māori 1987 i whakapuakina te reo Māori hei reo tūturu nō Aotearoa. I whakatūhia anō ko Te Taura Whiri i te Reo Māori hei whakatairanga i te reo. I taua tau anō, i tīmata te whakapāho a ngā reo irirangi Māori. I whakatūhia te Pouaka Whakaata Māori i te tau 2004.

Mai rāno i te tau 1997 he whai rautaki reo te kāwanatanga e ū ana ki te whakakaha i te mōhiotanga, i te whakamahinga, me te mana o te reo Māori. I te Haratua 2014 i nekehia e te rautaki hou te aronga o te whakarauoratanga mai i te kāwanatanga ki te tangata whenua me te aro ki te whakapikitanga o te whakamahinga o te reo i roto i te whānau me ngā hapori Māori (Te Puni Kōkiri 2014).

  • Share this page to Facebook
  • Share this page to Twitter
  • Share this page to Google+

Ka tutuki rānei ō wawata i te mōhiohio o tēnei whārangi?


Top
  • Share this page to Facebook
  • Share this page to Twitter
  • Share this page to Google+