Stats NZ has a new website.

For new releases go to

www.stats.govt.nz

As we transition to our new site, you'll still find some Stats NZ information here on this archive site.

  • Share this page to Facebook
  • Share this page to Twitter
  • Share this page to Google+
Mō Aotearoa

Ingoa Māori: Aotearoa

Tāone matua: Te Whanganui-a-Tara

Tāone tino nui: Tāmaki Makaurau

Ngā reo whai mana: Ingarihi, Māori, Te Reo Rotarota o Aotearoa

Taupori: 4,433,000 (whakatau tata i Pipiri 2012)

Horahanga: 269,652 kiromita pūrua

Moni: Tāra o Aotearoa

Kāwanatanga: Manapori kāwanatanga me te arikitanga whai kaupapa ā-ture

Ngā matawaka (mai i te Tatauranga 2006)(1)

Kauwhata, Ngā matawaka (mai i te Tatauranga 2006).  

1. Kua whakaurua rātou e hono ana ki ngā matawaka maha, ki ngā tapeke mō tēnā taupori
matawaka, mō tēnā taupori matawaka, me te aha neke atu i te 100 te tapeke ōrau. 

Taiao tūturu

E ōrite ana te rahi o Aotearoa ki tō Piritene Nui, ki tō Piripini rānei. Kāore he wāhi neke atu i te 130km te tawhiti mai i te moana. Rū ana te whenua o Aotearoa nā tōna noho tata nei ki te Tapa o Te Moana-nui-a-Kiwa, he puia anō hoki ōna. He hātai te āhuarangi, engari he āhua pārūrū ngā rangi o Te Tai Tokerau i ngā marama mahana ake (Hakihea ki te Poutū-te-rangi), ā, ka pāngia ngā wāhi ki tuawhenua o Te Wai Pounamu e te hukapuri i te takurua (Pipiri ki te Here-turi-kōkā). I ngā rā o nehe, karekau he kararehe whāngote tō Aotearoa, engari he maha ngā tipu me ngā manu māori, pērā i te kiwi.

Māori

I tae mai ngā tīpuna Māori mā runga waka i Te Moana-nui-a-Kiwa i te takiwā o te tau 1300CE. I tapaina te whenua nei ko Aotearoa. I noho ā-iwi rātou, e kawe ana i ngā pakiwaitara rētō e pā ana ki te whenua, ā, i tino waia ki ngā rau o te patu. I te tau 1840, i hainatia te Tiriti o Waitangi e ngā rangatira Māori 500 me ngā māngai a Kuini Wikitoria, hei whakahaumaru i ngā take whenua me te mana motuhake o te iwi Māori. Kāore i ū ki ngā kī taurangi, me te aha, i ngā tau ina noa nei kua tutuki i te kāwanatanga ētahi whakataunga tiriti ki te taha o ngā iwi maha. I tēnei wā tonu neke atu i te hāwhe miriona ngā tāngata Māori, e noho ana te nuinga ki ngā tāone. I ēnei tau tekau kua hipa kua hīkina anō te reo Māori, ngā momo toi, me ngā tikanga Māori.

Hītori 

Ko te tangata Ūropi tuatahi ki te ū mai ki Aotearoa nei ko te kaihopara Tatimana a Abel Tasman, i te tau 1642. Ko James Cook tētahi urungi nō Ingarangi nāna ngā takutai o te whenua nei i mapi mai i te tau 1769. I te tukunga atu o Aotearoa ki Ingarangi i te tau 1840, ka tatū mai te tokomaha, nō Peretānia te nuinga. I ngā tau 1890, ko Aotearoa te whenua tuatahi i whakaaetia ai te pōti wahine, me ētahi atu whakahōu tango here. Tokomaha ōna tāngata i ngaro atu i ngā pakanga nui e rua o te ao. I ēnei rangi, kua puta a Aotearoa mai i ngā ringa o Ingarangi hei whenua motuhake o Te Moana-nui-a-Kiwa nei, hei wāhi noho hoki mō ngā iwi maha. 

Ōhanga

He ōhanga mākete tō Aotearoa. Kua roa te wā i ahu mai te nuinga o ngā moni whiwhi ā-tau mai i ngā hua pāmu, pēnei i te wūru me ngā hua kau miraka. I ēnei rangi, kua hono atu ēnei ki ētahi whakawhanaketanga hōu pēnei i te tāpoi, te hanga kiriata, me te whakarite wāina. He kaha te whakawhirinaki ki ngā tauhokohoko ā-ao, ko ngā pātui nui ko Ahitereiria, Haina, Te Hononga o Amerika, me Hapani. Nā ngā whakahōunga ohaoha here kore i te tau tekau mai i 1980 i whakawātea ngā tauārai ki ngā haumi nō tāwāhi.

Hapori

He āhua rite te rahi o te taupori o Aotearoa ki tō Airangi, tō Hingapoa, tō Nōwei hoki. He tokomaha ake ngā tāngata e noho ana ki Te Ika-a-Māui i a rātou e noho ana ki Te Wai Pounamu, ā, ko te nuinga e noho ana ki ngā tāone. Ko Tāmaki Makaurau te tāone nui rawa, te wāhi noho hoki mō te tokomaha kua tau mai i Te Moana-nui-a-Kiwa me Āhia i ngā tau 50 kua hipa. E hāpai ana te kāwanatanga manapori i ngā kura, ngā whare wānanga me ngā hohipera, nā reira kua whai mātauranga, whai hauora hoki te nuinga o ngā tāngata o Aoteaora, heoi anō he pai hoki te oranga. Ko te Karaitiana te hāhi matua.

Ahurea

He rawe te whakatā ki ngā tāngata o Aotearoa. Ko te mahi māra, te pānui pukapuka, te hīkoi, me te haere ki tātahi, ētahi o ngā mahi e tino kaingākautia ana. He rawe hoki te hākinakina – tākaro mai, mātakitaki mai – ā, ahakoa kua eke te tīma whutupōro o te motu nei ki te taumata tiketike o te ao, ko te hahaupōro kē te hākinakina matua. Puāwai ana te ahumahi kiriata, ā, kua whai hua ngā kaupapa maha ki konei pērā i te toi auaha, te puoro, te mātātuhi, te whare tapere, me te whakahoahoa kākahu. Ka kitea ngā whare tongarewa me ngā whare whakairi toi puta noa i Aotearoa, me te maha hoki o ngā wāhi kai mīharo rawa.

Atahanga, Aotearoa: Ngā taupori ā-rohe.

View this page in English

  • Share this page to Facebook
  • Share this page to Twitter
  • Share this page to Google+
Top
  • Share this page to Facebook
  • Share this page to Twitter
  • Share this page to Google+