Stats NZ has a new website.

For new releases go to

www.stats.govt.nz

As we transition to our new site, you'll still find some Stats NZ information here on this archive site.

  • Share this page to Facebook
  • Share this page to Twitter
  • Share this page to Google+
He kōrero mō Te Kupenga
 Ko te tikanga o Te Kupenga ko te kupenga hao ika. I whakataurite a Pumi Taituha (nō Tainui), kua mate nei hoki, i te kohi tatauranga ki te hao ika ki tētahi kupenga. Ka whakataurite te ingoa Te Kupenga i te rangahau ki tētahi kupenga. Ko ngā raraunga me ngā mōhiotanga he kōrero, he kai rānei. Ka ukauka, ka whāngai hoki te kai i te iwi kia ora pai ai rātou. Ko te raraunga pai, ko te mōhiotanga pai hoki ka ukauka, ka whāngai hoki i te iwi kia ora pai ai rātou.

Mō Te Kupenga

Te tuku raraunga

Te tūmatataitanga me te matatapu

 
View this page in English

He tirohanga ki Te Kupenga

Kaupapa He kohi mōhiohio a Te Kupenga mō ngā kaupapa maha e whai tirohanga whānui mō te oranga o te Māori
Tīpakonga He tīpako matapōkere o ngā tāngata takitahi hei whakaata i te taupori Māori
Taupori Tata ki te 5,000 ngā tāngata takitahi
Auautanga Ko te tau 2013 te wā tuatahi ka whakahaerehia a Te Kupenga
Ngā hua Ka whakaputaina ngā hua o Te Kupenga i waenga i te tau 2014

Mō Te Kupenga

He aha te kaupapa o Te Kupenga?

He rangahau a Te Kupenga e kohikohi mōhiohio ana mō te oranga pāpori, ōhanga, ahurea hoki o te iwi Māori i Aotearoa. Ka whakarato mōhiohio hou a Te Kupenga mā ngā hapori Māori, te kāwanatanga, ētahi atu hoki e hiahia ana ki ngā piki me ngā heke a te Māori. Ka whakamahia ki te whāngai mōhio ki ngā kaupapahere me ngā kaupapa mahi mō te Māori.

I pēhea te kōwhiri i a au kia whai wāhi au ki Te Kupenga?

I kōwhiria e mātau ngā tāngata mō Te Kupenga mā te whakamahi mōhiohio mai i te Tatauranga 2013 i tū i te marama o Poutū-te-rangi 2013. I kōwhirihia ko te hunga 15 ngā tau, neke atu rānei, he uri Māori, he tuakiri Māori rānei, me te noho ki Aotearoa i te nuinga o te wā.

He aha ngā mahi mō te whai wāhi mai?

Ka uiui ā-kanohitia koe e tētahi kaiuiui nō Tatauranga Aotearoa, ka tuhi i ō whakautu ki tētahi rorohiko pona.

He reo rua te rangahau, ā, ka taea te whakaoti i roto i te reo Ingarihi, i te reo Māori rānei. Ka pātaihia koe ko tēhea te reo e hiahia ana ki te kawe i ō whakaaro. Ko te tikanga he 45 meneti ki te kotahi haora te roa o te uiui.

Te tuku raraunga

He aha ngā momo pātai i roto i Te Kupenga?

Ka kohikohi mōhiohio a Te Kupenga mō ngā kaupapa maha hei tuku mōhiohio hira mō ngā piki me ngā heke a te Māori. 

E pā ana ngā kaupapa ki ngā tirohanga Māori, tauiwi hoki mō te oranga: āhua reka o te noho, oranga whānau, hauora, me te mahi utu, kore utu hoki. Ka kohi mōhiohio anō i ngā wāhi he tino iti ngā mōhiohio whai mana, kāore rānei i te wātea, mā ngā pātai mō te reo tūturu, mō te hononga ki te tūrangawaewae, me ngā tikanga tūhono ai ki te ao Māori.

Ka kohi mōhiohio hira anō a Te Kupenga mō te reo Māori, tae atu ki te kaha matataunga, me ngā wāhi e kōrerohia ana te reo, ki a wai hoki.

Ko ngā kaupapa kei roto i Te Kupenga 2013

He aha e whakamahia ai anō ētahi o aku raraunga tatauranga i Te Kupenga?

Hei whakarāpopoto i te wā o te uiui, ka tāpirihia ētahi o ō raraunga tatauranga ki ngā whakautu ka tukuna i Te Kupenga. Ko ētahi o ō mōhiohio tatauranga ka tāpirihia ki ō whakautu ki Te Kupenga ko: tō tuakiri,  tō uri Māori, tō iwi, āu moni hua, tohu mātauranga, tō umanga hoki.

Ko ō mōhiohio katoa, mai i te tatauranga whānui me Te Kupenga, ka tiakina e Tatauranga Aotearoa me te noho matatapu e ai ki ngā whakaritenga o Te Ture Tatau 1975.

Ētahi atu mōhiohio mō te whakamahinga raraunga

He aha te take me whai wāhi au? 

He mea nui ō mōhiohio, ā, ka āwhina ki te waihanga i tētahi tirohanga tōtika mō te oranga o te Māori. E hiahia ana mātau i ngā tāngata katoa kua tohua mō Te Kupenga kia whakaotia te rangahau kia whaikanohi ai mō ngā Māori katoa, ā, kia tika ai ngā tatauranga.

E ai ki Te Ture Tatau 1975, mēnā i tohua koe mō tētahi rangahau a Tatauranga Aotearoa me mātua whai wāhi mai koe.

He toto Māori ōku engari kāore au e whakahua he Māori au. Me whai wāhi tonu au?

Āe, e hiahiatia tonu ana koe ki te whakauru mai. He mea nui tonu kia hopukina ki te rangahau ngā whakaaro me ngā wheako mō ngā tāngata katoa whai toto Māori kia waihangahia ai he tirohanga tōtika mō te oranga o ngā Māori katoa.

Ka pēhea te whakamahi i ngā mōhiohio o Te Kupenga?

He mea nui ngā mōhiohio ka kohia i roto i Te Kupenga. He whakarato tirohanga mō te āhua o te Māori puta noa i ngā wāhanga oranga whānui me te kohikohi raraunga mō ngā kaupapa kāore i te whai mōhiohio, he iti rānei ngā mōhiohio whai mana.

He tino hira ēnei mōhiohio mō ngā hapori Māori, te kāwanatanga, ētahi atu hoki e hiahia ana ki ngā piki me ngā heke a te Māori. Ka whakamahia hei tautoko i te aroturuki i ngā kaupapahere onāianei me ngā kaupapa mahi mō te Māori me te āwhina ki te waihanga kaupapahere me ngā kaupapa mahi mō ngā rā e tū mai. Ka taea e ngā kairangahau me ngā kaiwhakatakoto kaupapahere te hōpara i ngā mea e whai wāhi ana ki ngā whakaputanga oranga rerekē i roto i te taupori Māori.

Te tūmataitanga me te matatapu

He pēhea te tiaki i aku mōhiohio?

E tiakina ō mōhiohio i raro i Te Ture Tatau 1975, e kī ana:

  • ko ngā kōrero e kohikohia ana i raro i te Ture me whakamahi mō ngā kaupapa tatauranga anake
  • kāore e whakaaetia a Tatauranga Aotearoa kia tuku atu i ngā kōrero ka taea te whakamōhio atu ko koe tērā.

Me tiaki a Tatauranga Aotearoa i ngā mōhiohio ka whakaratoa e koe, ā, he mea nui ki a mātau tēnei herenga. Ka whakamahia anake ō mōhiohio hei whakaputa tauanga, ā, e kore e tukuna e mātau he mōhiohio e mōhiotia ai koe.

Ētahi atu mōhiohio mō Te Ture Tatau 1975

Ka taea te tuari i aku mōhiohio me ētahi atu tari kāwanatanga?

Kāo. Kāore e taea te tuku, kāore hoki e tukuna e mātau ō mōhiohio tūmataiti ki ētahi atu tari kāwanatanga.

Ka utua ahau mō te tuku mōhiohio ki Tatauranga Aotearoa?

Kāo. He here ā-ture te tuku mōhiohio ki Tatauranga Aotearoa. Kāore he whakaritenga i roto i Te Ture Tatau 1975 kia utua te tangata mō te tuku mōhiohio.

He pātai atu anō?

Mēnā he pātai āu mō Te Kupenga, he mōhiohio atu anō rānei, īmēra: social.cultural.statistics@stats.govt.nz.

  • Share this page to Facebook
  • Share this page to Twitter
  • Share this page to Google+
Top
  • Share this page to Facebook
  • Share this page to Twitter
  • Share this page to Google+